Wais ya Kristiyano

Epiphany of Our Lord

January 8, 2012

     Kada unsasabi so simba kapegleyay 2 anggad 8 ya Enero, isisilibra tayo so Somennidad na say Epifania. Sayan salita et nanlapu ed salitan Grego ya say labay ton ibaga ed say "pampakabat or pamabirbir" ed si Kristo ya sikato ed tuan too tan tuan Dios. 

       Diad samay istorya ed ebangelyo walaray taloran makabat nen saman ya panaon ya ingen say tradisyon ngangaranan to irarayan talo ya sikada di Melchior, Gaspar tan si Baltazar. Sarayan talo et nanregalo ed kinen ugaw ya Kristo. Sikaray angawit na balituk, insinso tan mira. Say kabaliksan daraya ed Kristiyanon konteksto ed say panmaliwan no umbaleg so sayan ugaw. Say balituk parad saray arari tan manmaliw met ya ari ed sangkamunduan si Kristo. Say Insinso et tutukuyen toy inkapari ya sikato ingey manmaliw ya sangkaatagueyan ya pari. Say mira et isisimbolo toy panangilaban nen Kristo ed amin ya katoowan ed intiron mundo laot lad saray mananisia ed sikato.

      Diad sayan bekta nampabirbir si Kristo ed saramay taloran makabat. Alikna da ya sikato ya talaga so manmaliw ya ARI, sangkatagueyan ya PARI tan MANANGILABAN. Akabatan ta ed mismon mata da ya amay abayag dalan tatalaranan ed naimatonan da.

     Ayan inkagawa et naynay ya nauuli lan nauulit et sikatayo met kada onloloob tayod simbahan ta akin nabibirbir tayod salita to say laman to ingen ya aawaten tayo met ed komunyon. Komun ta naalig tayo iraramay taloran wais ya makabat birbiren tayo met si Kristo tan awaten tayon naynay ed sacramentoy Santa Misa.